- Հայ Յեղափոխական Դաշնակցութիւն - http://www.arfd.info/hy -

Ավագ դպրոցը չպետք է դառնա հիմնական դպրոցի կրկնությունը

Ավագ դպրոցները չպետք է դառնա հիմնական դպրոցի կրկնությունը, իսկ ուսուցիչները կրկնուսույցներ։ Այս մասին այսօր՝ փետրվարի 15-ին, ավագ դպրոցների տնօրենների հետ հանդիպում-քննարկմանը ասաց ԿԳ նախարար Լեւոն Մկրտչյանը։

[1]

«Մենք, ավագ դպրոցում ունենք 16 առարկա, որոնք ծանրաբեռնում են երեխաներին եւ թույլ չեն տալիս նրանց կենտրոնանալ այն առարկաների վրա, որոնք անհրաժեշտ են նրանց ապագա մասնագիտությունն ընտրելիս ։ Պետք է այնպես անել, որ ավագ դպրոցը չդառնա հիմնական դպրոցի զուտ շարունակությունը կամ կրկնությունը։ Բոլոր միջազգայնորեն ընդունված կրթական համակարգերում ավագ դպրոցի առարկաները սահմանափակվում են 6 առարկայով»,-ասաց նախարարը։

Լեւոն Մկրտչյանը նաեւ նշեց, որ ավագ դպրոցը միայն բուհ ընդունվելու համար պատրաստելը չէ, այն նախ եւ առաջ երիտասարդներին պետք է կյանք մտնելուն պատրաստի.«Մեր խնդիրը երիտասարդին դաստիարակելն է ավագ դպրոցում։ Չպետք է աշխատենք երեխային միայն բուհ ընդունելու համար, ավագ դպրոցը պետք է երիտասարդին պատրաստի կյանք մտնել»։

Նրա խոսքով ՝ լուրջ խնդիր է նաեւ դպրոցի եւ բուհերի բռնած հումանիտարացման ուղղությունը.«Մեր դպրոցը աստիճանաբար եւ վստահորեն գնում է հումանիտարացման։ Անցած տարի բակալավր ավարտածների 70 տոկոսը հումանիտար հոսքի երեխաներ են եղել։ Մենք կարիք ունենք համալիր ծրագրի, որը երեխաներին կգրավի դեպի բնագիտական ուղղվածությունը»։