Ընտրական որոգայթը՝ հին համակարգը նոր յանկերգով

Ապրիլին կայանալիք խորհրդարանական ընտրութիւնները մեր ժողովուրդին կը ներկայացնեն ճակատագրական այն առիթը, երբ հայ քաղաքացին գէթ այս անգամ պիտի կարողանայ իր դատողութեամբ ու ազատ կամքով վճռել սեփական ապագան՝ ժողովուրդի ապագան, եւ հայրենիքի ապագան։ Այս ապագան պիտի հանդիսանայ գրաւականը հայրենիքի մէջ մէկ անգամ ընդմիշտ ու վերջնականապէս հաստատելու հաւասար իրաւունքներ եւ արդար կարգեր։

Նշեալ իրողութիւնը, հետեւաբար, մեր ժողովուրդին կը պարտադրէ կատարել յստակ ու ճիշդ ընտրութիւն, որպէսզի կարենայ նոր սկիզբով օժտել այդ ապագան՝ նուաճելու համար արդար Հայաստանի կայացումը։ Այս ուղղութեամբ լաւատեսութիւն կը ներշնչէ ընտրարշաւի ընթացքին զանազան շրջաններու մէջ քաղաքացիներու ուշիմ մասնակցութիւնը։

Այսուհանդերձ, գոյութիւն ունի ընտրական որոգայթ մը, որ ինքզինք ժողովուրդին դիմաց կը պարզէ ուռուցիկ խօսքերով, սին խոստումներով, եւ անպայման դրամով։ Գրաւիչ է այս որոգայթին հրամցուցած բառապաշարը, միաժամանակ հմայիչ են որոգայթ լարող այրերը՝ իրենց զգեստաւորուած արտաքինով։ Հայ քաղաքացիին պարտականութիւնն է թափանցել այս ընտրական թակարթի էութեան, որպէսզի կրկին անգամ չպատանդուի իր քուէն՝ ի շահ քաղաքական բախտախնդիրներու։

Այսպէս, այս ընտրութիւնները համակարգային փոփոխութեան մասին են։ Հայրենիքի մէջ երկու տասնամեակէ աւելի յամեցող համակարգի փոփոխութեան հարցը շեշտակիօրէ՛ն դրուած է հայ ընտրողին առջեւ։ Հայ քաղաքացին առանց դոյզն իսկ կաշկանդումի պիտի վճռէ պահե՞լ ներկայ համակարգը եւ քառորդ դարէ ի վեր զայն հովանաւորող ձախողած իշխանաւորները, թէ՞ վստահիլ իշխանութիւնը անոնց որոնք իսկապէս ու գործնապէս կարող են իրագործել ժողովուրդի կամքը ներկայացնող նոր համակարգը։

Յամեցող համակարգի շարունակման ջատագովները անոնք են, որոնք տարիներ շարունակ մսխեցին մեր ժողովուրդի վստահութիւն ն ու բարեացակամութիւնը, վատնեցին մեր ժողովուրդին պատկանող ազգային հարստութեան աղբիւրները՝ ի շահ իրենց սեփական գրպաններու յղփացման, եւ օտարացուցին մեր բարի ժողովուրդը իր սեփական պետութենէն։

Սեդօ Պոյաճեան

Ներկայ ընտրապայքարին մէջ այս ցեցանման այրերը հաւասարապէս ներկայացուած են իրենց անհատի շուրջ ստեղծուած կուսակցութիւններով եւ այլանդակ դաշինքներով։ Անշուշտ անոնք քաղաքական իմաստակներ չեն։ Անոնք վարպետ շողոքորթներ եւ ձիրքաւոր կեղծաւորներ են, որոնք ներկայիս մեր ժողովուրդին կը փորձեն ներկայանալ նոր յանկերգով եւ գառնուկի կերպարանքով, անմեղ արտաքինով եւ փայլուն հանդերձանքով, յուսադրիչ բառամթերքով եւ վաղեմի բարեկամի կերպարանքով։

Սակայն իրենք զիրենք տեւաբար վերարտադրող այս այրերուն նպատակը կը մնայ նոյնը։ Այսինքն, վերարտադրել հին համակարգը՝ իրենք զիրենք վերարտադրելու համար, որպէսզի շարունակեն իրենց ցեցային շահագործումները։

Այս անգամ մեր ժողովուրդը չի կրնար խաբուիլ, պէտք չէ խաբուի, որպէսզի կրկին անգամ զոհը դառնայ այս մասնագիտացած քաղաքական վաշխառուներուն։

Մեր ժողովուրդը ունի՛ այլընտրանք։ Ունի՛ Հայ Յեղափոխական Դաշնակցութիւնը, որ կը ներկայանայ իր գաղափարով, ծրագրով եւ թիմով։ Դաշնակցութեան գաղափարը հաստատակամ է, հետեւողական է եւ փորձուած է։ Դաշնակցութեան ծրագիրը իրապաշտ է եւ գործնական։ Դաշնակցութեան թիմը երիտասարդ է, մասնագիտացած է, մաքուր է, նուիրեալ է եւ զոհաբերող է՝ ի սպաս հայրենիքի եւ ժողովուրդին։

Դաշնակցութեան թիմը անձնականացուած չէ։ Այդ թիմը համամիտ եւ գործակից մարդկանց խմբաւորում է, որու յենարանը միայն ու միայն Դաշնակցական շարքերն ու համակիրներն են՝ Հայաստանէն մինչեւ Արցախ եւ մինչեւ Սփիւռքեան գաղթօճախները։

Աւելի յստակ, ինչպէս Հայաստանի Հ.Յ.Դ. Գերագոյն Մարմնի ներկայացուցիչ Աղուան Վարդանեան կը բացատրէր, «Նայէք մեր ռեյտինգային թեկնածուներին և նայէք միւսների թիմին, որոնք իրար կոկորդ են կրծում, մեզ մօտ նման բան չէք տեսնի։ Դաշնակցութիւնը կուսակցութիւն է, միւսներին նման չէ, եթէ լիդերը չլինի, ապա այդ կուսակցութիւնն էլ չի լինի: Դաշնակցութիւնն այն կուսակցութիւնն է, որ աշխարհի 30 երկրներում ներկայացուածութիւն ունի, հիմա դուք էք որոշելու, թէ ինչպիսի կուսակցութիւն էք ուզում ունենալ Ազգային Ժողովում»։

Դաշնակցութիւնը յանկերգ չունի, բայց ունի յստակ նպատակ՝ վերացնել հինը եւ հաստատել նոր համակարգը, որպէսզի հայրենիքը ըլլայ ժողովրդավար եւ Հայաստանը ըլլայ արդար։ Այս նպատակին համար Դաշնակցութիւնը նաեւ ունի աշխատանքի յստակ ծրագիր, զայն կիրարկելու ռազմավարութիւն, եւ զայն իրագործելու անհրաժեշտ կամքը, յանձնառութիւն եւ թիմ։

Դաշնակցութեան ընտրական ծրագիրը տեսաբանական մարզանքի արդիւնք չէ։ Ան խտացումն է մեր ժողովուրդի քաղաքական, տնտեսական եւ ընկերային իղձերուն ու պահանջներուն։ Այս ծրագրի թէ՛ ոգին եւ թէ առաջադրանքները կը բխին մեր ժողովուրդի կամքէն։ Ինչպէս Ռուբէն Տէր Մինասեան ատենին բացատրած է, «Մենք ականջ կը կախենք զանգուածի բանաւոր թելադրանքին. կը ջանանք հասկնալ զայն եւ մեր ծրագիրները յարմարեցնել ժողովուրդին, եւ ոչ թէ ժողովուրդը յարմարեցնել մեր ծրագիրներուն»:

Հետեւաբար, պէտք է խուսափիլ սարքուած ընտրական որոգայթէն։ Նոր յանկերգով հին համակարգը վերարտադրելու կամ նոր սկիզբով արդար Հայաստան ստեղծելու մասին է այս ընտրապայքարը։ Ապագայ հայրենի իշխանութիւնը մասնագէտ քաղաքական վաշխառուներու յանձնելու կամ Դաշնակցութեան պարկեշտ ու ատակ թիմին վստահելուն կվերաբերի այս ընտրութիւնը։

ՍԵԴՕ ՊՈՅԱՃԵԱՆ

Տպել Տպել