Քոնկրեսականներ Խստօրէն Դատապարտեցին Ցուցարարներու Վրայ Թուրքերու Յարձակումը

ՈՒԱՇԻՆԿԹԸՆ, «Ազատութիւն».- Թուրքիոյ նախագահ Ռեչեփ Թայիփ Էրտողանի Ուաշինկթըն կատարած պաշտօնական այցելութեան դէմ բողոքող ցուցարարներուն վրայ կատարուած վայրագ յարձակումը կը շարունակէ խիստ հակադարձութեանց պատճառ դառնալ, յատկապէս նկատի ունենալով, որ Էրտողանի թիկնապահները մասնակցած էին այդ բռնարարքներուն։

Ներկայացուցիչներու տան Արտաքին յարաբերութիւններու յանձնախումբի ատենապետ Էտ Ռոյս Մայիս 17 թուակիր նամակով մը կոչ ըրած է Միացեալ Նահանգներու ընդհանուր դատախազ Ճեֆ Սեշընզին եւ արտաքին գործոց նախարար Ռեքս Թիլըրսընին, որ անյապաղ քայլերու ձեռնարկեն՝ յարձակումի մեղաւորները պատասխանատուութեան ենթարկելու համար: Ան գրած է, որ օտար կառավարութիւններու աշխատակիցները պէտք չէ անձեռնմխելիութիւն ունենան, եւ յորդորած է նախքան Էրտողանի թիկնապահներուն մեկնումը՝ համապատասխան քրէական մեղադրանքներ ուղղել անոնց։

Իր կարգին, Ծերակոյտի Ռազմական սպասարկութեանց յանձնախումբի ատենապետ Ճան ՄըքՔէյն կոչ ըրած է Թուրքիա արտաքսելու Ուաշինկթընի մօտ Թուրքիոյ դեսպանը, որուն բնակարանին առջեւ տեղի ունեցած էին բռնարարքները։

«Պէտք է Միացեալ Նահանգներէն դուրս շպրտենք Թուրքիոյ դեսպանը։ Նման արարքներ պէտք չէ անպատասխան մնան», MSNBC կայանէն հարցազրոյցի մը ընթացքին յայտարարած է այս ազդեցիկ ծերակուտականը եւ նախագահական նախկին թեկնածուն: Աւելի կանուխ, ան «Թուիթըր»ի վրայ այս մասին գրած էր. «Նման բռնութիւններ որեւէ արդարացում չունին»:

Այս մասին նաեւ «Ուաշինկթըն Փոսթ» գրած է, թէ Միացեալ Նահանգներու կողմէ շատ ջերմ ընդունելութենէ ետք, Թուրքիոյ նախագահը հաւանաբար ինքզինք այնքա՛ն լաւ զգացած է, որ կարծած է, թէ իր երկրին մէջ կը գտնուի, եւ իր թիկնապահներուն հրահանգած է ծեծել խաղաղ ցուցարարները:

«Եթէ Էրտողան Թուրքիոյ մէջ, դժբախտաբար, յաջողութիւններ կ՛արձանագրէ այլախոհները ճնշելու գործին մէջ, այդ մէկը բնա՛ւ իրաւունք չի կրնար տալ իրեն, որ հոս գալով՝ յարձակի մեր հիմնարար ու նուիրական ազատութիւններուն վրայ: Անհրաժեշտ է յստակօրէն յայտարարել, թէ նման վարքագիծ անթոյլատրելի՛ է», ընդգծած է թերթը։

Բռնութիւններուն իբրեւ հետեւանք վիրաւորուած էր 11 հոգի եւ ձերբակալուած՝ 2 հոգի, որոնցմէ մէկը ազգութեամբ քիւրտ ամերիկացի մըն է, իսկ միւսը՝ Էրտողանի զօրակից մը։

Քաղաքի ոստիկանութիւնը կը յայտնէ, թէ հետաքննութիւնը կը շարունակուի եւ շատ հաւանական է, որ ուրիշներ եւս ամբաստանուին այս հարցով։

asbarez.com

Տպել Տպել