Նախագահական ընտրություններին իրանահայ համայնքում ևս եռուզեռ կա

Իրանի նախագահական ընտրություններին մարդկանց մասնակցության ակտիվությունը բավականին բարձր է, իրանահայ համայնքը ևս մեծ ակտիվությամբ մասնակցում է քվեարկությանը․ Tert.am-ի հետ զրույցում ներկայացնելով Իրանում նախագահական ընտրությունների ընթացքը՝ այսպես ասաց Իրանի Մեջլիսի հայազգի պատգամավոր Կարեն Խանլարյանը:

«Լուրջ միջադեպեր չեն գրանցվում: Խաղաղ, ժողովուրդը գնում է, բավականին հերթերի է սպասում է մինչև իրենց քվեն: Հայկական համայնքում ևս նույնչափ եռուզեռ կա, որովհետև այս ընտրություններից են կախված երկրի քաղաքական, հասարակական կյանքը»,- ասաց նա:

Հիշեցնենք, որ այսօր Իրանում անցկացվում են նախագահական ընտրություններ: Իրանի նախագահի թեկնածուները 4-ն են՝ գործող նախագահը, Իբրահիմ Ռաիսին, նախկին փոխնախագահ Մուստաֆա Հաշեմի Թաբան և պահպանողականների թեկնածու Մուստաֆա Աղա Միրսալիմը: Սակայն ընտրությունների բացարձակ ֆավորիտ է համարվում գործող նախագահ Հասան Ռոուհանին:

Հայ համայնքը, ըստ Կարեն Խանլարյանի, որևէ նախագահի թեկնածուի սատարելու մասին հայտարարությամբ հանդես չի եկել: «Իրանահայերը Իրանի ամբողջ հանրապետության մանրակերտն է՝ ամեն տեսակ մարդ կա՝ քաղաքական տարբեր հակումներով: Միանշանակ չէ, թե համայնքն ինչպես կմասնակցի ընտրությունների, ճիշտ էլ չէ դրա մասին խոսելը, որովհետև այդ հարցը նմանվում է այն հարցին, թե ինչպես կկողմնորոշվի Իրանի ժողովուրդը»,- ասաց նա:

Իրանահայ պատգամավորի խոսքով՝ հաղթելու պոտենցիալ ունեցող թեկնածուները գործող նախագահ Հասան Ռոուհանին է և Իբրահիմ Ռաիսին են: «Կարելի է ասել, որ նրանք քվեները կիսում են իրար հետ, 50-50 է թվում: Բայց պետք է սպասենք, թե ինչ կստացվի: Հաջորդը Աղա Միրսալիմն է»,- ասաց նա:

Իրանահայ պատգամավորը պատմեց, որ նախագահական ընտրություններին զուգահեռ Իրանի տասնյակից ավելի քաղաքներում, այդ թվում՝ Թեհրանում, ավագանու ընտրություններ են տեղի ունենում: Վերջինում, ըստ նրա, իրենց թեկնածություններն են առաջադրել երեք հայեր:

Վերադառնալով Իրանի նախագահական ընտրություններում հայ համայնքի ներգրավվածությանը՝ Կարեն Խանլարյանը նշեց, որ նախորդ շաբաթ են համայնքի մասնակիցները ժողով գումարել, կազմել նախագահի թեկնածուներին ուղղված իրենց պահանջները, հետո դա հրապարակային ներկայացրել: «Մենք աներկբայորեն հաստատեցինք այն դիրքորոշումը, որ դրական չեզոքություն պիտի պահպանենք: Նախապես պատրաստված պահանջագրի վրա մենք քննարկում ծավալեցինք, որոշակի խմբագրումներ արեցինք վրան, և դա կիրակի օրվանից ներկայացրեցինք բոլոր թեկնածուներին, սպասում էին արձագանքների: Որոշ արձագանքներ եղել են շատ ընդհանրական կերպով, հիմա արդեն սպասում են ըտրվող նախագահից, թե ինչպես կարձագանքի հայկական պահանջագրին»,- ասաց նա:

Իրանը, ըստ Կարեն Խանլարյանի, դանդաղ, բայց հաստատուն քայլերով գնում է դեպի ժողովրդավարություն: «Իրենք դա անվանում են հոգևորական ժողովրդավարություն: Ամեն տարի, շրջան առ շրջան դեպի ժողովրդավարություն գործընթացն ավելի է հստականում: Նկատի ունենալով տարածաշրջանի քաղաքական իրադարձությունները՝ Իրանի ժողովրդավարական վիճակը շատ բացառիկ է: Միջին Արևելքի շրջանում չկա մի երկիր, որը այսպես հաստատուն քայլերով ընթանում է դեպի ժողովրդավարություն: Այդ իմաստով Իրանը կստանա և՛ տարածաշրջանային, և՛ միջազգային բարձր հեղինակություն, որով կկարողանա ավելի հստակ դիրքերից լուծել տարածաշրջանային և միջազգային խնդիրները»,- ասաց նա:

Նա կանխագուշակեց Իրանի «ճակատագիրը» նախագահական ընտրություններից հետո՝ ավել կտրուկ դիրքերից կխոսի բանակցություններում․ Իրանի դիրքը բարձրանում է: «Կարծում եմ, որ Իրանն ավելի հեղինակություն ձեռք կբերի»,- ասաց նա:

Հռիփսիմե Հովհաննիսյան

tert.am

Տպել Տպել