Մեզ համար կարևորը գաղափարներն ու ծրագրերն են

Այսօր խորհրդարանում լրագրողների հետ զրույցում ՀՅԴ Բյուրոյի քաղաքական ներկայացուցիչ, ԱԺ ՀՅԴ խմբակցության ղեկավար Արմեն Ռուստամյանը նշեց, որ Դաշնակցությունը դեմ է «Ելք»-ի՝ ԵՏՄ-ից դուրս գալու առաջարկին:

Հարցին՝ կուսակցությունն արդյո՞ք քննարկել է հարցը, ն ապատասխանեց, որ դա հայեցակարգային խնդիր է, և իրենց մոտեցումներն այս սկզբունքային խնդրին վաղուց ձևակերպած և ձևավորած են: «Պարտադիր չէ, որ ամեն անգամ լայն հանրաքվե անցկացնենք` հասկանալու համար, թե ՀՅԴ-ն ինչպիսի մոտեցում ունի այս հարցի հետ կապված»,- ասաց պատգամավորը, ապա հավելեց, որ սա առանցքային հարցերից մեկն է, որն իրենք լայնորեն քննարկել ու ուսումնասիրել են դեռևս այն ժամանակ, երբ Հայաստանը որոշեց ԵՏՄ անդամ դառնալ:

Ռուստամյանը նաև վստահեցրեց, որ դրանից հետո իրենց մոտեցումները չեն փոխվել, ընդհակառակը` համոզվել են, որ Հայաստանի անվտանգության խնդիրները լուծելու ամենաճիշտ որոշումն էր այդ պահին: Նա նաև իրենց տեսակետի ճշմարտացիությունը փաստելու համար բերեց օրինակ, որ ԵՄ-ն էլ իր տեսակետը փոխել է: «Հնարավորություն է տալիս նորից վերադառնալու «և, և»-ի քաղաքականությանը՝ ունենալ միաժամանակ անդամակցություն թե՛ ԵՏՄ-ում, թե’ համապարփակ պայմանագրով ասոցացվել ԵՄ-ի հետ»,- նշեց պատգամավորը:

Հարցին՝ ի՞նչ անվտանգության հարց լուծվեց ԵՏՄ-ին անդամագրվելուց հետո, և դիտարկմանը՝ իրականում ՌԴ-ն որևէ աջակցություն ցույց չտվեց քառօրյա պատերազմի ժամանակ, նա արձագանքեց. «Բացարձակապես օդից վերցված հայտարարություններ են, իրականության հետ դրանք կապ չունեն: Մենք փաստ ունենք. մենք քառօրյա պատերազմում հաջողած երկիր ենք: Այդպիսի հարց տվողները չեն հասկանում` ինչ է նշանակում պաշտպանություն և զինված ուժեր: Եթե թվում է, որ միայն զինվորներն են հաղթում` դատարկ ձեռքերով, չարաչար սխալվում եք: Մեր զինվորների հերոսության վրա որևէ մեկը չի կասկածել, այդ թվում` նաև թշնամին, սակայն եթե մենք չունենանք ռազմական միջոցներ, դժվար է միջնադարյան միջոցներով այսօր պայքարել առաջադեմ երկրների դեմ»:

Ռուստամյանի խոսքով՝ մենք ունենք անվտանգության երկու հիմնական բաղադրիչ՝ հարաբերություններ Ռուսաստանի հետ և ՀԱՊԿ-ը: Նա ընդգծեց, որ այսօր Հայաստանն այլընտրանք չունի, թեև նշեց, որ դա չի նշանակում, որ չի կարող ունենալ: «Դրանով մենք չպետք է սահմանափակվենք, պետք է ամեն ինչ անել, որ կարողանանք այլընտրանքներ ունենալ, մեր անվտանգությունը ապահովել»:

Պատգամավորը նաև նշեց, որ տնտեսապես ԵՏՄ-ում ունենք մեծ հնարավորություններ, որոնք լիարժեք չեն օգտագործվել: «Մենք ենք մեղավոր, որ այդ շուկան լիարժեք չենք օգտագործել: Մենք չենք կարողացել այդ նոր իրավիճակին համապատասխանացնել մեր տնտեսությունը: Դա մեր խնդիրն է, որը պետք է լուծենք: Այդ խնդիրը պետք է լուծի կառավարությունը, իշխանությունները»,- ասաց նա` հավելելով, որ այնպես էլ չէ, որ ոչինչ չի արվել:

Ըստ Ռուստամյանի` «Ելք»-ի նախաձեռնությունը դրական կողմ ունի: ««Ելք»-ի նախաձեռնությունը ևս մեկ անգամ թերացումների մասին խոսելու հնարավորություն է տալիս, այդ առումով` շատ ողջունելի է»,- եզրափակեց նա:

Արմեն Ռուստամյանն անդրադարձավ Հայաստան-ԵՄ ասոցացման համաձայնագրի ստորագրմանը:

Լրագրողները հետաքրքրվեցին` արդյո՞ք վերջին պահին համաձայնագիրը կրկին չի ստորագրվի: Ռուստամյանը պատասխանեց, որ այս անգամ նման բան չի լինի: «Այն պատճառը, որի հետևանքով համաձայնագիրը չստորագրվեց, այլևս գոյություն չունի: Բոլոր բանակցությունները գնացել են այն տրամաբանությամբ, որ Հայաստանն արդեն ԵՏՄ անդամ է, և դա նշանակում է, որ այդ հանգամանքը հաշվի առնելով է, որ այդ գործընթացը սկսվել է, այսինքն` սրանք իրար հակառակ չեն»,- նշեց նա:

Հարցին՝ ճնշում չի՞ լինի Ռուսաստանի կողմից, պատգամավորը պատասխանեց, որ չի կարծում: «Չի կարող լինել, այդ ընթացքից Ռուսաստանն էլ է տեղյակ, գիտի, որ դա տեղի է ունենում: Խնդիրները, չեմ կարծում, այն սրությամբ են, որ կային նախորդ անգամ»,- կարծիք հայտնեց նա:
Հարցին՝ մեկ գիշերում որոշում չի՞ կայացվի, Ռուստամյանը պատասխանեց` ոչ:

Նրա խոսքով՝ այդ համաձայնագիրը շատ լուրջ բաներ է մեզ տալու: «Մեզ տալու է պետական շինարարության հետ կապված այն արժեհամակարգի արագ տեղայնացումը, որը մեզ այսօր անհրաժեշտ է: Մենք այսօր նոր խորհրդարանական համակարգի մեջ ենք, և եվրոպական պառլամենտարիզմի փորձը և դրա ձեռքբերումներն ու նվաճումները մեզ այսօր օդ ու ջրի պես պետք են, որպեսզի կարողանանք ճիշտ ուղորդել մեր համակարգը»,- ասաց պատգամավորը:

Իսկ հարցին՝ տեղյա՞կ են, թե ինչ փաստաթուղթ է համաձայնագիրը, քանի որ «Ելք»-ը նշում է, թե չեն տեսել այն, Ռուստամյանը պատասխանեց, որ ընդհանուր գծերով ծանոթ են:

ՀՅԴ խմբակցության ղեկավար Արմեն Ռուստամյանի կարծիքով` Կարեն Կարապետյանի գալով` իսկապես նոր շունչ մտավ կառավարման համակարգի մեջ: Այսօր խորհրդարանում լրագրողների հետ զրույցում, պատասխանելով հարցին՝ ի՞նչ դրական փոփոխություններ կարող է նշել վարչապետի մեկամյա գործունեության ընթացքում, նա նշեց, որ նորարարությունների արդյունքները տեսնելու համար ժամանակ է պահանջվում:

«Դժբախտաբար, դեռ այդ վիճակը չունենք, ուստի տեմպերը պետք է դրան համապատասխանեցվեն, տեմպերը կարող են գոհացնող չլինել, բայց ուղղությունը, որ կառավարությունը վերցրել է և կառավարության ծրագրով ներկայացվեց, գրեթե 90 տոկոսով համապատասխանում է մեր պատկերացումներին»,- ասաց պատգամավորը:

Ըստ նրա` գլխավոր հարցն այն է, թե շրջափակված Հայաստանը դեպի ծով ելք չունենալու պայմաններում ինչպես պետք է իր սեփական ռեսուրսները ձևավորի և այդ ուղղությամբ խնդիրները լուծի: «Կառավարության մեջ էլ ենք մենք նույնը անելու: Մեր բռնած ուղղությունը ճիշտ է, և կամաց-կամաց Հայաստանը դուրս է գալու այս ճգնաժամից»,- վստահեցրեց Ռուստամյանը:

Հարցին՝ կցանկանա՞ք, որ Կարեն Կարապետյանը շարունակի իր սկսած գործն առաջիկա տարիներին, նա արձագանքեց. «Մեզ համար կարևորը գաղափարներն ու ծրագրերն են, որոնք պետք է շարունակություն ունենան, դրա համար մենք ընդունել ենք կառավարության ծրագիր, որը 17-22 թվականների հետ է կապված: Անձի հետ կապված չէ: Իրականացնողն ո՞վ կլինի, մեզ համար, իհարկե, կարևոր է, որ իր հոգով-սրտով այս գործը կարողանա կատարել, բայց այդպիսի մարդիկ շատ կան, և մեզ համար, այդ առումով, անձն այնքան էլ կարևորություն չունի»:

Հարցին էլ՝ ինչո՞ւ ՀՅԴ-ն չունի վարչապետի սեփական թեկնածու, Ռուստամյանը պատասխանեց, որ դա քաղաքական օրինաչափ գործընթաց է: «Դուք երևի տեղյակ չեք կոալիցիոն համաձայնագրի տեքստից: Աայնտեղ շատ հստակ գրված է, որ այդ տեղը տրված է ՀՀԿ-ին, այդ պատճառով էլ իմաստ չունի, որ ՀՅԴ-ն իր սեփական թեկնածուի մասին խոսի»,- ասաց նա:

Ինչ վերաբերում է հարցին, որ Ծառուկյանը չի բացառել կոալիցիա կազմելը, արդյո՞ք ՀՅԴ-ն տեսնում է երեք ուժերի կոալիցիա, Ռուստամյանը նշեց, որ հիպոթետիկ հարցերի չի անդրադառնում, եթե կոնկրետ վիճակ լինի, այդ մասին կխոսեն:

Արմեն Ռուստամյանը անդրադարձավ մշակույթի նախարարության կողմից Թումանյանի տուն-թանգարանի տնօրեն Նարինե Թուխիկյանի կազմակերպած ցուցահանդեսի փակմանը:

«Սա, իհարկե, վրդովեցուցիչ է: Ես նոր եմ տեղեկացել դրա մասին: Հանգամանքներին քանի որ ծանոթ չեմ, չեմ կարող պատասխանել, բայց ցուցահանդես փակելը նորմալ բան չէ»,- ասաց նա:

Հարցին՝ խնդիրը թեմա՞ն էր, պատգամավորն արձագանքեց. «Ես չգիտեմ, մանավանդ` եթե 37-ի զոհերին է վերաբերում, ապա մշակույթի նախարարությունն ինքը պետք է խրախուսի նման ցուցահանդեսների անցկացումը: Մենք մեր պատմությունը պետք է լավ ուսումնասիրենք»:

Նա ևս մեկ անգամ նշեց, որ իր համար դա վրդովեցուցիչ է: «Մարդը ուսումնասիրություն է արել, դրա հետ կապված ցուցահանդես է հրավիրել, իսկ մենք գիտենք, որ Հովհաննես Թումանյանի երեք զավակները հենց դրա զոհն են եղել, այսինքն` կապ կա այդ ամեն ինչի մեջ»,- ասաց Ռուստամյանը:

Նշենք, որ օգոստոսի 4-ին Հովհ. Թումանյանի թանգարանի բացօթյա տարածքում կայացավ «Խավարում» խորագրով ցուցադրության բացումը, որը նվիրված էր խորհրդային բռնատիրության զոհերին: ՀՀ մշակույթի փոխնախարար Արև Սամուելյանի պահանջով ցուցահանդեսը փակվեց: Ցուցահանդեսի փակման կապակցությամբ Սամուելյանը նշել էր. «Ճիշտ է, թեման ակտուալ է, մենք պետք է պատմությանը պարզ երեսով նայենք, բայց կարծում եմ, որ այն մի փոքր քաղաքականացված էր: Այժմ սկսվել են փողոցների անվանափոխության հետ կապված գործընթացներ, և այդ ցուցահանդեսն էլ ընկալվել է այդ համատեքստում»:

Տպել Տպել