Նախագահ Աուն – Բագրատունի Հեռաձայնային Խորհրդակցութիւն

Վարչապետ Սաատ Հարիրիի անակնկալ հրաժարումէն անմիջապէս ետք, հանրապետութեան նախագահ զօր. Միշել Աուն խորհրդակցական հեռախօսազրոյցներ ունեցաւ լիբանանեան քաղաքական ղեկավարներու հետ:

Այս ծիրին մէջ, շաբաթ կէսօրէ ետք, նախագահ Աուն նմանօրինակ խորհրդակցութիւն ունեցաւ ՀՅԴ Լիբանանի Կեդրոնական կոմիտէի եւ հայկական երեսփոխանական պլոքի ներկայացուցիչ Յակոբ Բագրատունիի հետ, որուն ներկայացուց Հարիրիի հրաժարականին լոյսին տակ ստեղծուած իրավիճակը եւ այդ գծով իր մտահոգութիւններն ու դիմելիք քայլերը: Նախագահ Աուն անհրաժեշտ նկատեց հանդարտութեամբ եւ ողջմտութեամբ դիմագրաւել ներկայ փուլը, մինչեւ հրաժարականին տուն տուող պատճառներու լուսաբանումը:

Բագրատունի անհրաժեշտ նկատեց, որ լիբանանեան կողմերը հեռու մնան ծայրայեղ կեցուածքներէ, ու առիթը ստեղծուի բանականութեամբ, չափաւորութեամբ եւ երկխօսութեամբ ժամանակի ընթացքին որոնելու լուծումներ: Ան վերահաստատեց ՀՅ Դաշնակցութեան անվերապահ զօրակցութիւնը հանրապետութեան նախագահին` վստահեցնելով, որ բոլոր լիբանանցիները կ՛ապաւինին նախագահ Աունի խոհականութեան, իմաստութեան, զգօնութեան եւ հարցերը ճիշդ պարունակին մէջ տեղադրելու կարողութեան:

aztagdaily.com

06/11/2017

Տպել Տպել