ՀՅԴ 127 փառապանծ տարիներու առթիւ մեծ տօնախմբութիւն Մօնթէվիտէոյի մէջ

Ինչպէս բոլոր հայաշխարհը, Հայաստան, Արցախ և Սփիւռք, այս օրերուս մեծ հանդիսութիւններով կը տօնախմբեն ՀՅԴ 127րդ տարեդարձը, այստեղ ևս, Մօնթէվիտէոյի Վռամեան Կոմիտէի և քոյր միութիւններու միացեալ ճիգով, տօնախմբուեցաւ այս հզօր Կազմակերպութեան, ՀՅ Դաշնակցութեան 127 տարիները, Վռամեան ակումբի շքեղ հանդիսասրահին մէջ։

Նախքան սրահ անցնիլը, ակումբի շրջաբակի մէջ գտնւող մեր շրջանի Դաշնակցութեան հիմնադիր սերունդի և իրեցմէ ետք ֆիզիքապէս բացակայ մեր ընկերներուն համար կառուցուած Յուշակոթողի մօտ, տեղի ունեցաւ յարգանքի արարողութիւն, ուր խօսք առաւ ՀՅԴ Վռամեան Կոմիտէի անդամ Կարօ Հէքիմեանը, որմէ ետք բոլոր ներկաները մեխակներ զետեղեցին Յուշակոթողի տակ։

Տօնախմբութիւնը ընթացք առաւ երբ ՀՄԸՄ-ԿԱՄՔ-ի սկաուտներէ բաղկացած դրօշակակիռներ, «Արիւնօտ դրոշ»ի հնչիւններու տակ սրահ մուտք գործեցին, Հայաստանի, Արցախի և Դաշնակցութեան դրօշներով, որմէ ետք լսուեցաւ ՀՅԴ Քայլերգ «Մշակ բանւոր»-ը։

Օրուայ պատշաճ խօսքը փոխանցեց Վռամեան Կոմիտէի ներկայացուցիչ, ընկ.հի Իզապէլ Աթթարեանը ուր ի միջի այլոց ըսաւ «Դաշնակցութիւնը ինչպէս միշտ ըրած է իր պատմութեան ընթացքին, ոչ մէկ ճիգ չէ խնայած որպէսզի պահպանէ աշխոյժ, կենսունակ և կազմակերպ սփիւռք մը, այս մէկը նկատի ունենալով է որ այստեղ, մեր գաղութի մէջ ալ, բարեբախտաբար նոր հանգրուան մը սկսած է, ուր բարենպաստ մթնոլորտ մը կայ, մեզի հետ միասին բոլոր գործող միութիւններն ալ, համագործակցութեան ճամբաներ գտնելու, որպէսզի նախ միասնաբար զօրացնենք մեր գաղուգը, ապա օժանդակենք Մայր Հայրենիքին, անոր ազգային ապահովութեան և պետականութեան հզօրացման գործին» ըսաւ ընկերուհին։

Դաշնակցութեան 127-րդ տարեդարձի առթիւ իր սրտի խօսքը արտասանեց նաև Ուրուկուայի Հայոց Թեմի առաջնորդ Գերշ. Տ. Յակոբ արք. Գըլնճեանը, շեշտելով որ «ՀՅԴ-ն ունի փառապանծ պատմութիւն, բայց Դաշնակցութիւնը միայն պատմութիւն չէ, այլ ներկայութիւն։ Ներկայութիւն է նաև այս գաղութին մէջ, իր քաղաքական, մշակութային, մարդասիրական և մարզական կառոյցներով։ Ես կ՛ուզեմ շատ կարևորել Հայ Դատի համար տարուած և տարւող աշխատանքները այս գաղութին մէջ, ապրին Հայ Դատի երիտասարդները, ապրին բոլոր Հայ Դատի Յանձնախումբերը, որոնք գործեցին այս գաղութի մէջ, ես ուղղակի կը յարգեմ Հայ Դատի սքանչելի գործունէութիւնը և կը մաղթեմ որ բոլոր հայկական կազմակերպութիւններն ալ նոյնպէս աշխատին, ինչպէս կ՛աշխատի ՀՅ Դաշնակցութեան Հայ Դատի Յանձնախումբերը, այս մէկը կ՛ըսեմ քանի որ պատիւ կ՛զգամ որ այսպիսի համայնքի մը հոգևոր առաջնորդն եմ, ուր կան մարդիկ որոնք կը տանին հոյակապ աշխատանք և ազգապահպանման գետնի վրայ, Հայ Դատի ուղղութեամբ, ինչու չէ նաև պաշտպանելով Հայ Եկեղեցւոյ շահերը։

Դիւրին է նստիլ և ըսել թէ մենք ղեկավար ենք այսինչ, այնինչ ակումբին, սակայն առանց գործունէոււթեան, դիւրին է և դատապարտելի, իսկ Դաշնակցութիւնը, եղած է գործի կուսակցութիւն և յատկապէս այս գաղութին մէջ, բոլորս ալ կը վկայենք, անկարելի է չտեսնել Դաշնակցութեան այդ գործունէութիւնը» ըսաւ Սրբազան Հայրը։

Բեմ հրաւիրուեցաւ ՀՅԴ Արմենիա Երիտասարդական Միութեան անդամներէն, Ռօմինա Գույումճեանը որ մեծ զգացումով և սպաներէնի թարգմանուած, յայտնի Դաշնակցական մտաւորական Երուանդ Պոյաճեանի «Դաշնակցականը» գրութիւնը ներկայացուց, յուզելով շատերը։

Համազգայինի Շիրազ պարախումբը, ինչպէս բոլոր տօնական հանդիսութիւններուն, այս անգամ ևս իր մասնակցութիւնը բերաւ հայկական, թէ ժողովրդական և թէ ռազմական պարերով, ինչ որ մեծ ոգևորութիւն ստեղծեց և տարբեր երանգ մը տուաւ, խանդավառելով բոլոր ներկաները:

Տօնակատարութիւնը շարունակուեցաւ Պ. Այրէսէն ի մասնաւորի հրաւիրուած Նոր Արաքս նուագախումբի ելոյթով և յայտնի երգիչ Ալեխանտրօ Չիփեանի մասնակցութեամբ, որոնք յեղափոխական և հայրենասիրական իրենց երգ ու նուագով սրահը թնդացուցին, մինչև որ հասաւ ավանդական կարկանդակի հատումը, որուն շուրջ հաւաքուեցան վեթերան և ներկայ ընկերներ։

ՀՅԴ Վռամեան ակումբի հանդիսասրահին մէջ բերնէ բերան լեցուցած ներկաները, ընկերներ և համակիրներ, կրկին անգամ հաստատեցին թէ, ՀՅ Դաշնակցութիւնը և իր քոյր կառոյցները ընտրած են ճիշտ ճանապարհ, որ ուրիշ ճանապարհ չի կրնար ըլլալ եթէ ոչ այն միակ ուղին, որ կը տանի Հայաստանի և Հայութեան տեսլականը իր վախճանական իտէալին հասցնելու, գրխագիրով գրուած, ԱՄԲՈՂՋԱԿԱՆ ՀԱՅԱՍՏԱՆԻՆ, ԱմԲՈՂՋԱԿԱՆ ՀԱՅՈՒԹԵԱՄԲ:

Տպել Տպել