Հայ Դատի Երկար Տարիներու Ջատագով Էտ Ռոյս Պիտի Հեռանայ Քոնկրեսէն

ՈՒԱՇԻՆԿԹԸՆ.- Ներկայացուցիչներու տան Արտաքին յարաբերութեանց յանձնախումբի ատենապետ Էտ Ռոյս Յունուար 8ին յայտարարեց, թէ որոշած է չմասնակցիլ այս տարուան քոնկրեսական ընտրութեանց՝ աւելցնելով, որ Արտաքին յարաբերութեանց յանձնախումբի ատենապետի պաշտօնին վրայ իր վերջին տարուան ընթացքին շեշտը պիտի դնէ երկրին սպառնացող արտաքին վտանգներուն աւելի ազդու կերպով դէմ դնելու ջանքերուն վրայ։

Նշենք, որ Ռոյս 1992էն ի վեր կը ներկայացնէ Օրենճ Քաունթին, ուր կը բնակին մեծ թիւով հայեր. ան իր պաշտօնավարութեան առաջին օրերէն սկսեալ նեցուկ կանգնած է հայութիւնը յուզող հարցերուն, յատկապէս՝ Հայոց Ցեղասպանութեան ճանաչման, Արցախի ժողովուրդի ինքնորոշման եւ Հայաստանի ու Միացեալ Նահանգներու միջեւ յարաբերութիւնները սերտացնելու ջանքերուն։

Ռոյսի յայտարարութենէն ետք, Ամերիկայի Հայ Դատի յանձնախումբը դրուատեց անոր երկար տարիներու հայանպաստ քայլերը՝ լուսարձակի տակ առնելով յատկապէս Արցախի մէջ խաղաղութիւնը հաստատելու նպատակով անոր եւ քոնկրեսական Էլիըթ Էնկըլի համահեղինակած առաջարկները։

Իր կարգին, Արեւմտեան Ամերիկայի Հայ Դատի յանձնախումբի ատենապետ Նորա Յովսէփեան յիշեցուց, թէ շրջանի Հայ Դատը տարիներէ ի վեր մօտէն գործակցած է քոնկրեսական Ռոյսի հետ՝ երախտագիտութիւն յայտնելով Հայաստանի, Արցախի եւ Հայոց Ցեղասպանութեան զոհերուն արդարութիւն ապահովելու ջանքերուն ի նպաստ անոր տրամադրած աննկուն նեցուկին համար, միաժամանակ խոստանալով գործակցութիւնը շարունակել մինչեւ անոր պաշտօնավարութեան աւարտը՝ յաջողութիւն մաղթելով անոր ապագայ ծրագիրներուն։

Քոնկրեսական Ռոյս անդամ է Քոնկրեսի Հայկական համախմբումին. անցեալ տարի ան առաջնորդողի դեր ստանձնած էր Թուրքիոյ նախագահ Ռեչեփ Թայիփ Էրտողանի թիկնապահներուն կողմէ ամերիկացի խաղաղ ցուցարարներու վրայ գործուած յարձակումը դատապարտող եւ անոր համար հաշուետուութիւն պահանջող արշաւին մէջ։ Անցեալ Հոկտեմբերին, ան նաեւ մասնակցութիւն բերած էր Արեւմտեան Ամերիկայի Հայ Դատի յանձնախումբին կազմակերպած խորհրդաժողովին՝ քոնկրեսական Էտըմ Շիֆի կողքին, շեշտելով Արցախի ժողովուրդի ինքնորոշման պայքարին նեցուկ կանգնելու եւ զինադադարը ամրապնդելու ջանքերուն կարեւորութիւնը։

asbarez.com

Տպել Տպել